9 

   Редкие молитвы и молитвословия


МОЛИТВА ПРЕД ИКОНОЙ БОЖИЕЙ МАТЕРИ
НЕОПАЛИМАЯ КУПИНА

О пресвятая и преблагословенная Мати сладчайшего Господа нашего Иисуса Христа! припадаем и покланяемся тебе пред святою и пречистою иконою твоею, еюже дивная и преславная чудеса содеваеши, от огненнаго запаления и молниеноснаго грома жилища наша спасаеши, недужныя исцеляеши, и всяко благое прошение наша во благо исполняеши. Смиренно молим тя, всесильная рода нашего Заступнице, сподоби ны немощныя и грешныя, твоего матерняго участия и благопопечения. Спаси и сохрани, Владычице, под кровом милости твоея Церковь святую, обитель сию, всю страну нашу православную, и вся ны припадающия к тебе, с верою и любовию, и умиленно просящия со слезами твоего заступления. Ей, Госпоже всемилостивая, умилосердися на нас, обуреваемых грехами многими и не имущих дерзновения ко Христу Господу просити Его о помиловании и прощении: но тебе предлагаем к Нему на умоление, Матерь Его по плоти: ты же, Всеблагая, простри к Нему богоприимнеи руце твои, и предстательствуй за нас пред благостию Его, просящи нам прощения прегрешений наших, благочестнаго мирнаго жития, благия христианския кончины и добраго ответа на страшнем суде Его. В час же грознаго посещения Божия, егда огнем возгорятся домы наши, или молниеносным громом устрашаеми будем, яви нам милостивное твое заступление и державное всепоможение: да, спасаеми всесильными твоими ко Господу молитвами, временнаго наказания Божия зде избегнем и вечное блаженство райское тамо унаследуем, и со всеми святыми воспоем пречестное и великолепое имя покланяемыя Троицы, Отца и Сына и Святаго Духа, и твое велие к нам милосердие, во веки веков. Аминь.

Тропарь.

Иже в купине огнем горящей и несгораемей, показавый Моисеови Пречистую Твою Матерь, Христе Боже, огнь Божества неопальне во чреве приимшую и нетленну по рождестве пребывшую: Тоя молитвами пламене страстей избави нас, и от огненных запалений град Твой сохрани, яко многомилостив.

Тропарь.

Иже во огни купины неопалимыя, древле Моисеем виденныя, тайну воплощения своего от неискусобрачныя Девы Марии преобразовавый, той и ныне, яко чудес творец и всея твари Создатель, икону ея святую чудесы многими прослави, даровав ю верным во исцеление недугом и в защищение от огненнаго запаления. Сего ради вопием преблагословенней: надеждо христиан, от лютых бед, огня и грома избави на тя уповающия, и спаси души наша, яко милосерда.

 

   назад    оглавление    вперед   

red@mrezha.ru
www.mrezha.ru/vera