Зряще мя безгласна, и бездыханна предлежаща, восплачите о мне, братие и друзи, сродницы и знаемии: вчерашний бо день беседовах с вами, и внезапу найде на мя страшный час смертный; но приидите вси любящии мя, и целуйте мя последним целованием, не к тому бо с вами похожу или собеседую прочее; к Судии бо отхожу, идеже несть лицеприятия: раб бо и владыка вкупе предстоят, царь и воин, богатый и убогий в равнем достоинстве: кийждо от своих дел или прославится, или постыдится. Но прошу всех и молю, непрестанно о мне молитеся Христу Богу, да не низведен (низведена) буду по грехом моим на место мучения, но да вчинит мя, идеже Свет животный.