Боже, в возношении Авраамовом благоволивый, и Иеффаевы жертвы не отвергий, ни презревый Авелевы дары, Самуила же ради отрока матерь его Анну пророчицу показывай, Ты, Господи мой, Господи, мене ради раба твоего приими душу добрыя матере моея. Помяни болезни ея и труды, яже о мне. Помяни стенание и слезы ея, яже излия, егда к Тебе от нея прибегох. Помяни сосцы ея, имиже воздои мя, надеяся утешение и помощь от мене имети, и не получи надеяннаго. Не забуди, Владыко, рыдание сердца ея мене ради, егда оставих ю Тебе ради. Помяни, коликия нощи не взыде сон на очи ея, непрестанно поминающия мою юность, свое же сиротство. О коль боляще сердцем, смотря на моя одежды, в няже уже не облачашеся драгоценный ея бисер. Помяни, коликия радости и веселия лиших оную моим от нея отшествием, да Тебе моему и ея Богу и Владычице работаю. Даждь ей Ангела твоего, хранителя крепкаго, избавляещаго душу ея от воздушных духов лукавых и немилостивых, вся пожрети хотящих. Повели же, Боже мой, душе ея без болезни и без страха разлучитися от тела, и вся согрешения ея, яже в жизни сей содея, яко благ прости. Ей, Боже правосудне! не отведи ю от печали в печаль, и от беды в беду, и от стенания в стенание; но вместо печали, еюже о мне единородном сыне своем поболе, подаждь ей радость, и вместо слез веселие, уготованное святым Твоим, Боже мой.