МОЛИТВОСЛОВ

МОЛИТВА СВЯТОМУ ПРЕПОДОБНОМУ ИСПОВЕДНИКУ НИКОНУ ОПТИНСКОМУ

О Никоне священниче, о преподобне наш авва, старчества Оптинскаго светлый венец и новомучеников Русских благовонный цвете! Ты первее постническими трудами душу твою очистив, демонския ополчения посрамил еси, послушанием, яко быстротечною лествицею на верхи добродетелей достигл еси и веры благославный исповедник явився. В годину же гонений безбожных терпением мужески облекся еси, и яко пастырь добрый и яко истинный сын старцев Оптинских люд страждущий принимал и утешал еси. Сего ради от богоборных многия скорби претерпев и во изгнание осуждён был еси, но якоже тогда от паствы твоей духом не отлучився, но пастырскою свирелию молитв твоих добре упасл еси овцы твоя, сице и ныне не отступай от чад твоих духом твоим, но присно с нами пребывай, да укрепляемы тобою веру истинно сохраним и заветы Оптинских старцев вседетельне исполним.

Паче же моли Всеблагаго Господа нашего Иисуса Христа, да утвердит в Православии Церковь нашу, Отечество и люди, да сохранит обители монашеския, верныи обетом иноческим, да дарует нам прошение грехов и покаяние истинное, да очистившися тем, возлюбим еже есть едино на потребу: прилеплятися Христу Богу и Спасу нашему всем сердцем, всем помышлением, всею волею и всем чувством, ничтоже любя от похотей мира сего, и тако от сетей миродержителя тьмы века сего избавляющеся, во смирении воспоём и прославим всесвятое имя Отца и Сына и Святаго Духа ныне и присно и во веки веков. Аминь.

назад

вперед