АКАФИСТ
святителю Стефану,
епископу Пермскому
Возбранный святителю, учителю премудрый,
равноапостольный Стефане, всем верою к тебе прибегающим источаяй многоцелебные
дары, похвальная восписуем ти любовию, творящии память твою. Ты же, имеяй
дерзновение ко Господу, от всяких нас бед свободи, зовущих:
Радуйся,
Стефане, великий чудотворче!
Ангельское твое во плоти житие провидев
всея твари Создатель, от юности твоея уготова тя в сосуд честенъ. Тем же научи
вопити тебе сице:
Радуйся, трехлетней сущей матери твоей, блаженным Прокопием
Святитель возвещенный. Радуйся, прежде рождения твоего великим прореченный.
Радуйся, рождением своим родителей удививый.
Радуйся, благочестивых родителей Богоприятное испрошение. Радуйся, от благочестиваго
корене отрасль святейшая. Радуйся, в научении книжном паче сверстников
просвещенный. Радуйся, в юности разум совершенный явивый. Радуйся, измлада
Христа возлюбивый. Радуйся, ярем Его носивый. Радуйся, мир и благая его
презревый. Радуйся, плоть свою духови покоривый. Радуйся, изрядное благодати
жилище.
Радуйся,
Стефане, великий чудотворче.
Видя тщету мирских попечений, блаженне
Стефане, отшел еси от дому родителей твоих водворяяся с работающими Богу во
иноческом житии. Тем же жизнь твою не мирови, но Богу посвятил еси,
благоприятно Ему вопия: Аллилуиа.
Разум плотскому человеку неуразуменный,
от юности твоея стяжавый, Богомудре Стефане, удивил еси талантами любомудрыя
души твоея. Тем же взываем ти сице:
Радуйся, образе кротости духовныя.
Радуйся, вместо временных благих вечная стяжавый. Радуйся, чистоты усердный
хранителю. Радуйся, терпения Богомудрый учителю. Радуйся, братолюбия зерцало.
Радуйся, постников первостоятелю. Радуйся, молитвами твоими дивная сотворивый. Радуйся,
иноком правило благочестия. Радуйся, святителей собеседниче. Радуйся, терпением
видимых и невидимых врагов победивый. Радуйся, веры поборниче. Радуйся,
Апостолов подражателю.
Радуйся,
Стефане, великий чудотворче.
Сила Вышняго, в душеспасительных подвигах
чудно укрепившая тя, угодниче Христов Стефане, показа Пермяном перваго
проповедника Еvангелия, потом перваго епископа и молитвенника, да вси,
просвещаеми светом добродетелей твоих дивному во святых своих Богу взываемъ:
Аллилуиа!
Имея данную ти от Бога благодать недуги
отгоняти, был еси пастырь добрый, по горам нечестия заблуждающих обретаяй и на
путь истинный направляяй. Сего ради молитвами твоими врачуеми, взываем ти:
Радуйся, Богомерзскаго идолослужения
искоренителю. Радуйся, ересей истребителю. Радуйся, правоверия насадителю.
Радуйся, заблуждающих наставниче. Радуйся, миролюбцев обличителю. Радуйся,
сластолюбцев наказателю. Радуйся, враждебных примирителю. Радуйся, малодушных
утешителю. Радуйся, злобы и зависти исторгателю. Радуйся, к воздержанию
путеводителю. Радуйся, к трезвенному житию наставниче. Радуйся, во унынии
закосневающих исправителю.
Радуйся,
Стефане, великий чудотворче!
Бурю злых помыслов прилежно от себе
постом и молитвами отражая, явился еси храм Духа Святаго, о Нем же непрестанно
от юности твоея во всяком благочестии и чистоте пребывая, обыкл еси воспевати
Богу: Аллилуиа.
Слыша архиерей Ростовский Арсений
целомудренное житие твое и тщание в славословии и в воспевании дивных дел
Божиих деейтвующу и наставляющу Святому Духу, призва тя в клир и града Устюга в
соборнем храме проглагола тя чтецемъ. Потом во иноческом житии паче иных
потрудившася, Коломенский архиерей Герасим приосенением тогоже Святаго Духу,
постави тя диакона и пресvтера, и в сем священном достоинстве действием
Божественныя благодати показался еси мирови добрый наставник монахов и мирских,
да славя Бога в Троице покланяемаго, взываем и тебе:
Радуйся, мудрости небесныя жилище.
Радуйся, радости истинныя причастниче. Радуйся, миром небесным приосененный.
Радуйся, долготерпения искус стяжавый. Радуйся, веры христианския правило.
Радуйся, благости Божественныя струя. Радуйся, кротости духовныя доблий
хранителю. Радуйся, воздержания учителю. Радуйся, соль мира. Радуйся,
светильниче всесветлый. Радуйся, на свещнице нетления всем светити поставленый.
Радуйся, граде верху горы стояй.
Радуйся,
Стефане, великиий чудотворче.
Боготечная звезда северо-восточная явился
еси, егда просвещения ради светом Богопознания идольския земли, текл еси, да
вси познавше Творца вселенныя, с нами едиными усты и единым сердцем Ему
вопиютъ: Аллилуиа.
Видев доброту души твоея многими
даровании свидетельствуемую, архиерей Герасим по твоему желанию, снабдив для крещения
людей и освящения церквей потребными, с радостию отпусти тя в великую Пермь. Мы
же апостольство твое чествуем приветствии сими:
Радуйся, апостолов единоревнителю.
Радуйся, мудрости сосуде. Радуйся, разумное светило. Радуйся, таин Божиих вещателю.
Радуйся, кротости еvангельския образе. Радуйся, Боговедения рачителю. Радуйся,
благочестия столпе. Радуйся, страха Божия приятелище. Радуйся, духовная труба
Еvангелия. Радуйся, органе псалмопения и славословия. Радуйся, премудрый
наставниче. Радуйся, к блаженству вечному путеводителю.
Радуйся, Стефане, великий чудотворче.
Проповедник Боговедения неленостен был
еси в неведущей Бога земли, и благим своим житием любовь и благоверие к
вещаниям твоим приобрел еси толикое, яко и неверныя, чтя добрая дела твоя
научишася тобою взывати Богу: Аллилуиа.
Возсия христианское благочестие в земли
растленной идолослужением егда начал еси Божественное семя в безбожных сеяти, и
утверждая их в вере истинной примером своим всего себе посвятил еси Богу. Мы же
похвальная восписуем ти:
Радуйся, волю ищущую нетления стяжавый.
Радуйся, главу горния мудрости исполнивый. Радуйся, земная мудрования
презревый. Радуйся, очи от мирския прелести отвративый. Радуйся, уста на
хваление Господа употребивый. Радуйся, язык к Божественной проповеди устроивый.
Радуйся, руце прострый на молитву и подаяние милостыни. Радуйся, теми же
множество книг душеспасительных написавый. Радуйся, сердце твое постом и
молитвою в жилище Духа Святаго
уготовавый. Радуйся, нозе ко бдению и благовествованию мира направивый. Радуйся, все твое тело
воздержанием удручивый. Радуйся, непрестанным Богомыслием душу и тело
освятивый.
Радуйся, Стефане, великий чудотворче.
Хотя тайну вечнаго спасения Пермяном поведати,
потщался еси первее навыкнути несведомому их словеси и близкий к ним быти
беседник таже составив письмена и ими к назиданию их и службе Божественной
потребная изобразив многия писания, даровал еси пособие пети: Аллилуиа.
Новое и спасительное слышав учение
пермские люди, овии ругахуся, овии же крещения просяху, и чудяся дивному житию
твоему, с учением из уст исходящим согласному, прославиша Бога. Ты же потщался
еси крещением просвещати люди, и к славословию Божию освящати храмы. Сего ради
воспеваем тебе:
Радуйся,
пастырю добрый. Радуйся, Христов новый исповедниче. Радуйся, учителю премудрый.
Радуйся, апостольство твое свято совершивый. Радуйся, идольскую лесть
упразднивый. Радуйся, луче света Еvангельскаго. Радуйся, тьмы заблуждения истребителю.
Радуйся, неверных учением своим удививый. Радуйся, кротостию своею гордость
мирскую поправый. Радуйся, овцы Христовы во едино стадо совокупивый. Радуйся,
духовную паству твоими к Богу благоприятными молитвами оградивый. Радуйся, всем
призывающим тя скорый помощниче.
Радуйся, Стефане, великий чудотворче.
Странное чудо показал еси, Богомудре
Стефане, предав огню скверную идольскую божницу, егда с разными орудии
обступиша тя бесовские чтители, убити тя хотяще. Ты же, моляся о обращении
заблуждающих молчаливою кротостию сих победил еси, воспевая Богу: Аллилуиа.
Весь Стефане пречудне, телом и душею
посвятился еси Богу, пребывая в непрестанных трудах Божественнаго Богословия, и
презирая угрожения нечестивых претящих ти проповедати славу Божию. Сего ради
вопием ти:
Радуйся, земный ангеле. Радуйся, небесный
человече. Радуйся, вития непобедимый. Радуйся, воине Христов неустрашимый.
Радуйся, христианскаго благочестия истинный ревнителю. Радуйся, врагов церкве
Христовы обличителю. Радуйся, нечестивых витиев посрамителю. Радуйся, столпе от
нощи неведения к солнцу правды приводящий. Радуйся, уста Божественная миру
спасение возвещающая. Радуйся, гласе небесныя истины буих умудряющий. Радуйся,
неверных светом Еvангелия Христова просветивший. Радуйся, подобно теплоте
солнечной оляденевшыя сердца их согревший, и тем плод мног церкви Божией
принесший.
Радуйся, Стефане, великий чудотворче.
Все естество Ангельское возвеселися о
твоем благочестии и чистоте, о твоем мужестве, терпении, бдении в молитвах
пощении и по Бозе ревности. В оных бо претерпевая, яко безплотен явился еси, мы
же прославляющемуся чрез тебе Богу взываемъ: Аллилуиа.
Ветия многовещанныя безбожных чары
творящии онемеша. Сила бо крестная превозмогаше всем их волхвованиямъ. Мы же
видевше на видимых и невидимых врагов победительная, усердно вопием ти:
Радуйся, несумненною верою дивная
сотворивый. Радуйся, живым на Бога живаго упованием чтителей бесовских
посрамивый. Радуйся, за любовь к Богу и ближнему душу твою положивый. Радуйся,
крепости Божественныя приятелище. Радуйся, органе возвещающий славу Божию.
Радуйся, громе устрашающий соблажняющия. Радуйся, идольския лести истребителю.
Радуйся, диавольских козней обличителю. Радуйся, гордости его сокрушителю.
Радуйся, плоды трудов твоих во сто уплодоносивый. Радуйся, неверных умудривый
твоими нравы. Радуйся, погибающих руководствуяй к приятию вечныя славы.
Радуйся, Стефане, великий чудотворче.
Спасти хотя Пермскую землю, всемерно
потщался еси просветити ю святым крещениемъ. Потом своими руками идолов
раздробляя и сокрушая богомерзская капища, на развалинах их церкви
христианския, монастыри и училища довольная воздвигл и научил еси единому
триvпостасному Богу пети: Аллилуиа.
Стена и укрепление в нечестии пермяном
Пан сотник волхв с велиею дерзостию в сонмищи глагол безумный утверди. «Кто
пройдет в зимнее время невредим водою, и кто огня не устрашится, того вера есть
истинная, и жертвоприношение Творцу неба и земли есть приятное». Ты же
смиренномудрия вещая глаголы, ко Всевышнему о помощи взывал еси, и верою, вся
возмощи о имени Его, стяжав упование, повлекл еси суемудраго волхва в пламень
огненный. Он же силою Божиею устрашенный, исповеда пред всеми свое безсилие и
малодушных обольщение. И тако всея Пермския страны в веру истинную свершися
обращение. Сего ради блажим тя, премудре Стефане, сими:
Радуйся, щите православия. Радуйся,
смиренномудрия зерцало. Радуйся, великаго упования образе. Радуйся, ковчеже
чудес Богом устроенный. Радуйся, злочестиваго волхва славно препревый и из
земли тоя изгнавый. Радуйся, последователей его на путь истинный обративый.
Радуйся, князя мира сего посрамивый. Радуйся, жертвоприношения идольская
упразднивый. Радуйся, труды Пермян от лова зверей им в пользу сотворивый.
Радуйся, благая их вместо душевреднаго пред идолами сожжения, в потребу им и на
службу человекам показавый, и тако страну их умудривый. Радуйся, пределы
Российския проповедию слова Божия разширивый. Радуйся, не токмо временная, но и
вечная благая Пермяном открывый.
Радуйся, Стефане, великий чудотворче.
Пение молебное приносим ти, cвятителю
Стефане, егоже на возвратном из Перми пути молящася Святей Троице и
благословляюща обитель, преподобный Сергий Радонежский, умныма очима за
несколько поприщ провидев благодарным со братиею на трапезе почтил есть
поклонениемъ. Мы же всегдашняго тя о душах наших стяжавше молитвенника, и
щедроты твоя изчести не могуще, благодарными сердцем и усты Богу, тобою
действующему всем исцеления, взываемъ: Аллилуиа.
Светоподательный светильник сущим во тьме
идолослужения, отче Стефане, явился еси, и до конца паству твою бодренно упасл
еси, ограждая новопросвещенныя люди своими к Богу молитвами, и поставляя из них
самих пастырей и учителей Перми, посем скончавая течение твое, о нем же
пророчески предсказал еси, мощи твоя многоцелебныя царствующему граду Москве в
залог молитв твоих и теплаго ходатайства даровал еси, духом же со Ангельскими
чинми ликуеши. Сего ради восхваляюще тя глаголемъ:
Радуйся, духом везде верныя посещаяй.
Радуйся, от адския погибели изымаяй. Радуйся, от сетей льстиваго избавляяй.
Радуйся, вместо временных вечная блага нам подаваяй. Радуйся, врачу, раны
греховныя исцеляяй. Радуйся, вместо смерти живота вечнаго ходатаю. Радуйся
недужных целителю. Радуйся, особенный России хранителю. Радуйся, всем
прибегающим к тебе крепкое забрало. Радуйся, царствующаго града украшение.
Радуйся, светило всероссийское. Радуйся, Ангелов собеседниче.
Радуйся, Стефане, великий чудотворче.
Благодать цельбы стяжавшаго, великаго во
святителех Стефана почтим сердцем и усты. И да вящшее благим его подвигам
воздадим чествование, потщимся всемерно подражати его добродетелем да
благоприятно Богу вопиемъ: Аллилуиа.
Поюще твое, Стефане святителю, о
призывающих тя в помощь, теплое предстательство, и от врагов видимых и
невидимых скорое заступление, хвалим тя вси, равноапостольный Богопроповедниче,
и веруем яко Господь и Бог проповеданный тобою в Перми и прославляемый в телеси
твоем молитвами твоими вся нам дарствуетъ. Темже вопием ти:
Радуйся, нищетою духовною Царство
Небесное получивый. Радуйся, покаяния и умиления слезами утешение вечное
приявый. Радуйся, кротостию земли новыя наследие приявый. Радуйся, алкая и
жаждая правды, ныне насыщаяйся. Радуйся, милостынями обретый помилование.
Радуйся, чистотою сердца сподобивыйся зрети Бога. Радуйся, миротворениями Богу
усыновивыйся. Радуйся, терпением правды ради Царство Небесное стяжавый.
Радуйся, поношениями и претерпением всех зол Христа ради ублаживыйся. Радуйся,
твоим примером нам путь ко спасению открывый. Радуйся, молитвами твоими труды и
подвиги облегчаяй. Радуйся, предстательством твоим у Христа Бога вечное
спасение нам подаваяй.
Радуйся, Стефане, великий чудотворче.
О великий святителю, равноапостольный
Стефане, малое сие моление наше приемши, умоли подвигоположника и совершителя
Иисуса, да избавит царствующий град и всякий град и страну христианскую от
нахождения иноплеменных от ересей и расколов и от всякия напасти, и да измет
грядущия муки всех Ему вопиющихъ:
Аллилуиа.
(Кондак сей глаголи трижды,
та же Икос 1 и Кондак 1)
Молитва Святителю и равноапостольному Стефану,
епископу Пермскому
О Богоосвященный и равноапостольный
Стефане, новый Боговедения проповедниче, и просветителю крещением святым
великопермских во идолопоклонстве живущих людей, ко истинному евангельскому
свету путеводителю, пастырю добрый и учителю премудрый, Духа Святаго сосуде
избранный, Христоподражательный в небесный Сион наставниче и руководителю,
образе благонравия всем благочестно жити желающим благоискусный мысленнаго
корабля, чрез море мира сего к небесному пристанищу плавающаго, правителю,
дивный во иерарсех увенчанный Божественною благодатию, всероссийский
светильниче, великий чудотворче и молитвенниче теплый! К тебе во умилении души
и сокрушении сердца моего, аз окаянный и грешный (имярек) благонадежно
притекаю, и вопию, прося смиренный помощи твоея и теплаго ко преблагому Богу
ходатайства, да твоими богоприятными молитвами испросиши ми от Него
человеколюбную милость, оставление многих моих согрешений, души и телеси
здравие со спасениемъ. И, яко благ и человеколюбец да благоволит безбедно в
мире сем ходити ми до скончания живота моего, во время же разлучения моего от
жизни сея дух мой в покаянии и мире Ангелом своим святым милостивно прияти, и
от мрачных и злоковарных и лютых духов демонских на воздусе прошед невозбранно,
к Нему непостыдно предстати поклонитися, и безсмертныя и блаженныя жизни
сподобитися со всеми святыми во веки. Аминь.
Божественным желанием от юнаго возраста
Стефане премудре разжегся, ярем Христов взял еси, и людей оляденевшая древле неверием сердца, Божественное семя в
них сеяв евангельски духовне породил еси. Темже преславную твою память
почитающе, молим тя: моли, Егоже проповедал еси, да спасет души наша.