МОЛИТВОСЛОВ
МОЛИТВА К БОЖИЕЙ МАТЕРИ (написана священником Григорием Ахидовым, О, Пресвятая и Пречистая Дево Богородице, Мати Сына Божия, Сына Человеческаго, Мати и Заступнице всего рода человеческаго, Госпоже и Владычице мира! Весь род человеческий, усыновленный Тебе Сыном Твоим Господом Иисусом Христом при Кресте Его, вси праведно живущии в чистоте и святости, воистину чада Твоя суть, аз же ленивый и грешный, нечестивый, нечистый, злонравный, неблагодарный, непотребный, недостоин нарицатися сыном Твоим, недостоин аз, окаянный, и обращения к Тебе, Пречистей. Поелику бо от юности и до сего дне и часа делателище есть и угодник всячески диаволу, а не Богу, многообразно оскорбляя и Тебя, Пречистая и Пренепорочная. Беден, нищий и убогий, безобразен, прокажен и изъязвлен есмь страстьми, пороками и беззакониями, в зловонных ранах греховных, смердящий, яко на дне рва глубиннаго, безсилен и безпомощен лежу, несть избавляющаго, помогающаго, ни спасающаго; горе ми! горе ми! горе ми! Кто изведет мя от рова сего погибельнаго! Несть ми оправдания пред Богом и пред Тобою, Пречистая Дево Богородице! Како реку или возопию: помилуй мя или прости ми? Недостоин бо есмь милости и прощения, безмернаго ради, и множества тяжких моих грехов. Множество содеянных мною, лютых помышляя, окаянный, трепещу страшнаго дне суднаго, повинен бо есмь осуждению и всем мукам, имея произволение на всякое злое дело. Страшно ми впасти в руце Бога Живаго, Создателя моего, Промыслителя и Правосуднаго Судии и Мздовоздаятеля моего. Обаче в горести и в нестерпимой скорби в час сей, прежде неже егда приидет час погибели моея, егда имать лукавый и злобный демон восхитити и обладати мною, прибегаю к Тебе Единей, Избранней от всего рода человеческаго, Пречистей и Благодатней, сподобльшейся быти Матерью Сына Божия, Искупителя и Спасителя нашего, Господа Иисуса Христа, Матери и Заступнице всего рода христианскаго, матернее дерзновение имущей к Богу, матернюю любовь к роду человеческому, Честнейшей Херувим и Славнейшей без сравнения Серафим. Услыши стенание мое и вопль мой, не возгнушайся мене, достойнаго презрения, не отвержи мене, достайнаго отвержения, но спаси мя, погибающаго... Прости ми вся, еликими оскорбих Тя и Господа моего Иисуса Христа: злым произволением, делами, словами, мыслями и намерениями моими. Не отчаиваюсь, но верую с надеждой, получити от Тебе милость, прощение и спасение, яко от Матери Преблагого Бога. Но аще и недостоин есмь, дерзаю, с упованием на любовь и милость Твою, просити и за ближних моих, не мене единаго точию помилуй, но помилуй всех людей, созданий Божиих, душу живущую имущих. Яко Мати всего рода человеческаго, в первых: имже Бог вверил правление церковное и народное, патриархов, митрополитов, архиепископов, епископов, священников и диаконов, весь причет церковный и весь иноческий чин. Помилуй, Пречистая, и жену мою, чад моих, братьев и сестер моих и всех сродников по плоти, чад моих духовных и други моя, всех же напаствуемых и боримых от врагов, плоти, мира и диавола, защити и спаси их данною Тебе от Бога благодатию. Такожде помилуй и всех от века преставльшихся, во всякое время и на всяком месте жития сего отшедших, да и тии вси не придут на место мучения, уготованного диаволу и ангелом его, аще и согрешиша оныя пред Господем и пред Тобою, помилуй, Пречистая, всех нас и покрый Своим благодатным Божественным Покровом и избави нас от всякаго зла. Ты бо еси источник Милосердия, Любви и сострадания к несчастным, падшим, погибающим и погибшим, Мати Божия, спаси нас! О, Преблагословенная в женах! Превознесенная Благодатию Всевышняго над земными и небесными, Дево, Богородительнице, от всех родов избранная и достойно Ублажаемая, Прибежище и Упование наше, Покров, Защищение и Помощь, от Бога нам дарованная. Ты наша Надеждо спасения, Взыскание и Спасительнице погибающих и погибших. Споручнице грешных, Утешение и нечаянная их Радость спасения! Скоропослушливо внемлющая гласом нашим смиренным. Даруй нам Свое Матернее благословение и милость. Буди нам присная Покровительнице и Заступнице от всякаго зла в сей временней жизни, в смерти и по смерти. Благодатию и щедротами и человеколюбием Твоего Сына и Бога нашего Господа Иисуса Христа, яко да вкупе со всеми и мене, непотребнаго и недостойнаго, сподобиши воспети и возвеличити Тя, Сущую Богородицу, достойно ублажаемую и славимую, и величаемую от Архангел и Ангел и всех святых, прославленную живоначальною Троицею, Отцем и Сыном и Святым Духом. Да и Тобою и о Тебе вечно святится и прославляется вседержавное имя Пресвятыя Троицы: Отца и Сына и Святаго Духа, от всех святых, и помилованных, и спасенных грешников во веки веков. Аминь.
На глав. страницу. Оглавление выпуска.О свт.Стефане.О редакции. Архив.Почта |
